مبادرة وينك يا وخيا: بين الحنين الي الماضي و بناء المستقبل

0
253

الاعلان نيوز

مبادرة وينك يا وخيا: بين الحنين الي الماضي و بناء المستقبل

يحكيو على بلاد، موش كيف غيرها مالبلدان
بلاد بحرها ما يعومش فالصيف، تمشي كيلومتر و الماء للركبة، شطوطها حشيش و حجر و ماها ماهوش مالديفي.
بلاد ما فيهاش وتلة تصلح و بواتات، فيها كياس عمرو عشرين سنا و ستين دودان.
في اوت، الباڨات توفى العشرة متاع الصباح و الحليب يتفقد و يبعثولها مالخضرة و الغلة كان السقاطة.
البلاد هذي ماء سبالتها مالح، ترابها مالحة، هواها مالح و جلدة ناسها شايحة بالملح.
البلاد هذي يروحولها اكثر من ميتين الف كل عطلة وصيف.
اولاد البلاد يختلفو في برشة حاجات، و الباهي و الخايب في كل بلاصة، كيف ما يقولو…
اولاد البلاد تجمعهم حاجة وحدة : ذكرياتهم و فرحتهم كل مرواحة… هاك التنهيدة مالجواجي اول ما عجالي الكرهبة يمسو سقالة سيدي يوسف.
كلنا عدينا النهار تحت غراسي سيدي فالنخل و البرانقة… كلنا ضللنا تحتهم و فرشنا كليم مقطع… كلنا قعدنا على ڨلاسيار الماء الزرقاء و استنينا ملية العشية و قشرنا المرقة في هاك البانو الأحمر عالشط…
كلنا تعلمنا العوم بنفس الطريقة : طيش الكازي تو يطف…
يكذب عليك الي يقلك كنت نعوم خير مالملولي… كلنا بدينا بعومة مالاول، تمروح بيديك و ساقيك و تحاول تشرب اقل شي ممكن مالبحر.. منبعد وين كنا نتعداو لواحة و فراشة و عالظهر.. ديجا كلنا نعومو فيهم بالغالط.
كلنا تكردغنا و تجرحنا و حرقنا الكانون و عدينا كسكروت الفروماج بالكزة.
كلنا سهرنا حتى طلعت الشمس عالشط و إلا فالسقالة و إلا قدام المنشر… و اكثرنا جرب عومة البرط الصباح بكرى.
كلنا تعاركنا بقشور الدلاع و جرينا ورا بعضنا بالثلج الي فضل فالبوليستار…. كلينا الشوابي مقفول و تصورنا بالسواد خالط لحواجبنا.
كلنا ربطنا الابالص و عملنا فلايك و عدينا القوايل فالسبخة نلمو فاللوح و المشمع.
كلنا خرجنا عالاقل مرة مع دماسة و تبعنا سردمة حجر و لمدنا ببوش الربيع، وقت الخير، يا حسرة.
شكون فينا ما ذاقش بنة الاميلة المرفوعة في آخر اوت و ما لعبتش براسو كعبة شلبة بيتتو يحلم بالفريجيدار طايح عليه و الكلاب تجري في جرتو.

كلنا جربنا عومة مرسة العشرين و بونومة فالحيا و بوزينا مع البابور الشاحط… عملنا قهوة عند بربح و كلينا الجيلاط متاع سنية…

كلنا جربنا التبحيرة سبعطاش في كانوطة و دربكنا على سطل مڨعور و غنينا : عندك بحرية يا رايس و فالمرواح تربخ ام كلثوم و عبد الحليم… كلنا تكركرنا بحبل ورا الشقف و دزينا بعضنا و تقرضنا و طاحت على ريوسنا الانتينة…. جربنا المقادف و القرية و شحطنا و هبطنا ندزو فالترش.
فينا الي يثبت على قهوة طنطن و كعبة الفريكاسي و الڨازوزة المصڨعة بعد عومة فالڨرمدي.

في قرقنة، السعادة عمرها ما ارتبطت بالامكانيات، الخلاعة ما تفرضش عليك تاخذ قرض و تتسلف…
في قرقنة الفرحة قدامك، في لحضة…
في لحضة تبرمج تبحيرة و تتعبي القفف
في لحضة تركح خرجة للحمادة و يطيب محمص عالحطب و ريحة البخور مالثلاثين لمدخل البلاد تعجعج.
في قرقنة تهز روحك راس و رويس، انتي و عشيرك ، شطية حرايرية (غزل) و تمشي لهنشير ريغو… تجيب مرقة و تضحك و تعفس عالبوقوار و تشعل زرداب بالجريد و تقشر حوتاتك بقفا مغرفة… و تتعشى على ضو المحرقة.
قرقنة، للي ما يعرفش، ارخببل : متكون من اربعطاش جزيرة فيهم زوز اكهو مسكونين.
معناها مالبلايص القلال الي تنجم تلقى فيهم روحك وحدك في جزيرة، تحت ظل نخلة فالرمادية و إلا فالبرود متاع كالاتوس الڨرمدي… جزيرة ليك وحدك، تصيح، تجري، تغني، تضحك و ما يهمك في شي.

في قرقنة، و في بلايص معينة… تراكي و تنصب طاولتك و كراسيك و تعدي النهار عالبحر وحدك، ما يقلقك حد، ما يقربك حد، ما يمرجك حد.
في قرقنة، راس المال هوما الاصحاب و الجيران…
ناس، كيف يسمعو بيك مروح ، يعرضوك بالخير في ساشيات صغار : حارة رطب مخبية مالشتاء، شوية عظام شوابي بالذمة، قرنيطة شايحة، قلادة كروفات مبشمطة…
في قرقنة عندي صاحبي يوسف، عام كامل يخزن و يخبي فالحوتة العزيزة و الغالية باش يودني، عندي تاتا صباح اتطيبلي شهواتي في غياب امي، تاتا سميرة تودني بالبسيسة و الحوار ، نجوى تخليلي بايتي فالڨرفيلة و الفول و الزروصية…كان نسمي، نضيع و ننسى… برشة حبايب عشرتهم ديامنت و ميزانهم لويز.
في قرقنة العملة تتبدل و الدينار ما يقضيش… راس مالك تبسيمة و ما تنساش باش تقول : يفتح عليك.
في قرقنة يودوك و يحبوك لله، لوجه الله و يغضبو كان ترجع صبع شكلاطة… الناس الباهية، السباقة للخير و الدالة عليه.
في قرقنة نقولو : سلامو عليكم فالمشية و الجاية و الصباح نقولو ساااااعييييد… بالنزلة عالالف و الياء.
نحكي باسمي و نعرف كلامي يمثل الاغلبية… قرقنة قرقارة ، النوم فيها عندو معنى، المحبة عندها معنى، الفرحة و الزهو عندهم معنى…. الباقي الكل ما يهمش… الوقت الي يتعدى، التعب، البرد، التمرميد… كلها تفاصيل تافهة تزيدنا حب في ترابها.
بسام عوادي

ترك الرد

من فضلك ادخل تعليقك
من فضلك ادخل اسمك هنا